Lollos en Lettie is ou bekendes by die US Woordfees. Naomi Meyer gesels met die sterre van die vertoning – en ook met Minki Burger, wat saam met hulle dans en sing.
Lollos, is jy dan al tien? Die naam van julle nuwe DVD is Lollos en Lettie 10-jaar-basaar. Of werk jare anders in Lallaland as op aarde?
In Lalaland werk ons nie met jare nie, die lekker tye is baaaie lank en die hartseer tye is baie kort want die Foempies kom vee vinnig ons traantjies weg. Ek moes leer van dae, maande en jare toe ek eers op die aarde kom kuier het. Ek het sulke lekker liedjies geleer sing wat sommer vinnig vir my al die name van die dae, en al die maande van die jaar geleer het! Dit is veral lekker om dit saam met die maatjies te sing - dan leer hulle dit ook sommer dit in 'n japtrap saam!
Vir mense wat nog nooit van jou gehoor het nie, wie is jy?
Ek en Lettie is Lalalanders. Ons kom van die planeet Lalaland af en kom kuier graag by ons aarde-maatjies omdat daar so baie wonderlike dinge is om te leer in julle wêreld. Die heel, heel lekkerste ding vir ons is om te kom sing en dans saam met al ons aarde maatjies en ons lekker vriende - Alta, Minki, Disco, Karla en Muisvriend!
Die nuwe DVD en die konsert by vanjaar se Woordfees bied hoogtepunte van die afgelope tien jaar se musiek.
Na watter liedjies kan jong luisteraars uitsien?
Hierdie konsert is nog die lekkerste een sover! Dit is 'n heerlike mengelmoes van al ons beste en bekendste treffers! Ons het probeer sien dat iedereen se gunsteling-liedjie 'n kans kry en dit maak die vertoning baie opwindend en sommer hope pret!
Lettie, jy is Lollos se beste maat. Maar jy is ook 'n meisie in eie reg. Wil jy iets van jouself vertel?
Oe la la! Ek het verskriklik baie om julle van myself te vertel!
Ek is natuurlik Lalaland se Herwinkoningin, jy weet? Ek het 'n baie belangrike werk in Lalaland om seker te maak die Lalalanders pas hulle planeet mooi op deur hulle te leer van herwinning en hoe om hulle wêreld mooi skoon te hou! Ek is baie goed daarmee, hoor! En verder is ek 'n regte, egte ballerina! Ek is versot daarop om te kom dans hier by julle, ek het nou al die wonderlikste danspassies geleer en soos julle weet is ek ook 'n modeontwerper - jy kan gerus 'n spesiale Lettie-tutu vir jou kom koop by die konsert! Ek maak hulle self! Ag, ek is net so baie lief vir Lollos en vir die maatjies hier op aarde - om hier te kan kom kuier is vir my feno-mino-mino-minaal!
Is dit nie baie warm om so baie te dans nie? Wat is die lekkerste en die minste lekker van al die dansvertonings?
Ag, dit maak nie saak om so bietjie warm te kry nie - om te dans is dan soveel pret! Die lekkerste is om te sien hoe gelukkig ons maatjies is as hulle kan saamdans en die slegste is dat die konsert nie vir ewig kan aanhou nie!
Watter liedjies op julle nuwe DVD is vir jou die heel lekkerste?
“Die kiem”, “Die paddakonsert”, “Bons dat die gons”, “Hoe maak die krokodil?”, “Spring op”, “Ek wil dans”, “Die disco jive” … en daar is nog so baie ... Ek weet nie watter een om te kies nie! Al ons heel lekkerste liedjies is daar!
Minki, jy is die draaiboekskrywer en regisseur van Lollos en Lettie 10 jaar-basaar se DVD. Vertel asseblief vir die lesers van jou reis saam met Lollos en Lettie, 'n terugblik.
Sjoe - dis moeilik om te glo hierdie is al die tiende “episode” van Lollos. Dit was voorwaar 'n ongelooflike reis wat gestrek het oor die afgelope 12 jaar. Ek en Alta [Joubert] het baie klein begin met 'n droom wat later die God se genade vermenigvuldig is tot baie meer en groter as wat ons ons kon indink. Dit was met tye 'n moeilike pad maar dit was ook altyd ongelooflik verrykend en bevredigend om te weet ons beteken iets vir klein kinderhartjies reg oor die land en selfs oorsee. Dit was 'n groot voorreg om saam met Lollos te stap die laaste dekade of so, en saam met hom groot te word en saam met hom so ongelooflik baie dinge te kon leer. Ek noem dit altyd in my persoonlike kapasiteit die Universiteit van Lollos; die menigte vaardighede wat ek bygekry het en die lewenslesse wat ek geleer het sal altyd van onskatbare waarde vir my bly en het my beslis gevorm en gehelp om te maak wie ek vandag is.
Vertel asseblief iets van hierdie nuwe DVD van julle - ek weet jy het die draaiboek geskryf en was verantwoordelik vir die gedagtes hieragter. Waarna dink jy is hedendaagse Afrikaanssprekende ouers en kinders op soek as dit kom by lekkersing- en dansliedjies? Wat bied julle vir die mark?
Lollos en Lettie 10-jaar-basaar is regtig net 'n lekker terugblik op al Lollos en Lettie se avonture oor die laaste 10+ jaar. Dis 'n lekker saamsing-DVD en -konsert - almal sal al die woorde ken! Die pas is lekker opgewek en vinnig, so daar is nie tyd vir stilsit nie, almal se voete sal jeuk om saam te dans op al die ou bekende treffers. Dit is 'n huldeblyk aan die bydrae wat Lollos aan die Afrikaanse musiekbedryf gemaak het oor die laaste dekade - en in egte Lollos-styl is dit baie kleurvol en energiek!
Die klimaat in die Afrikaanse mark en ook kindermark is vandag aansienlik anders as hoe dit was toe ons oorspronklik begin het met Lollos. In daardie dae was Afrikaanssprekende ouers uitgehonger vir gesonde Afrikaanse vermaak en daar was min om van te kies. Deesdae is daar baie meer keuses in Afrikaans, en dit is 'n goeie ding! 'n Groot verskil is ook wel dat internasionale kindervermaak deesdae 'n groter rol speel in Afrikaanse huise omdat dit soveel makliker beskikbaar is aanlyn en dus 'n kitsoplossing vir ouers bied as hulle op enige plek vir hul kinders wil vermaak bied. Gelukkig het Lollos ook nou 'n app vir slimfone en tablette waarop jy jou Lollos-films kan aflaai om enige plek te kyk.
Hoe gereeld dans julle by bestemmings dwarsdeur die land? En waarna kan julle luisters en kykers uitsien by vanjaar se Woordfees? Ook: sal hulle kan saamdans?
Gaan besoek gerus on tuisblad (www.lollos.co.za) of ons Facebook-blad (https://www.facebook.com/Lollosfriends/) vir alle inligting oor ons vertonings. Ons doen weekliks vertonings op verskillende bestemmings regdeur SA en ook gereeld in Namibië. Vir die afgelope 10 jaar doen ons so min of meer 120 vertonings per jaar en ons neem ook deel aan baie feeste. Indien daar dalk belanstelling is om ons te bespreek kan mense ons kontak by hanli@lollos.co.za.
By die US Woordfees kan feesgangers verwag om 'n baie opgewekte en interaktiewe konsert te beleef met al die lekkerste Lollos gunstelinge, spesiaal aanmekaargeweef vir saamsing en saamdans pret! Hoe meet uitbundig hoe beter! Lollos, Lettie, Disco en Karla neem die kyker op 'n toer van die laaste 10 jaar en dink terug aan die lekker lessies wat geleer is en snaakse grappies wat gemaak is. Ons dink ook terug aan die fantastiese gaste wat al by Lollos kom kuier het!
Waar kan mense Lollos se nuwe DVD bestel as hulle nie by een van jul vertonings kan uitkom nie?
Bestel gerus op ons webtuiste: http://lollos.co.za/winkel/
Stuur epos aan info@lollos.co.za vir navrae.
Lollos Dvd's is beskikbaar by Musica en op Takealot.
As jy 'n Android-foon het kan jy die Lollos Wolkie App aflaai en daar enige Lollos film koop om direk op jou slimfoon of tablet af te laai en te kyk. (Apple in die pyplyn) https://play.google.com/store/apps/details?id=com.lollos.wolk
Lollos-produkte is ook by al ons vertonings beskikbaar.
LOLLOS & LETTIE 10 JAAR-BASAAR
Skrywer en regisseur: Minki Burger Musiek en vervaardiger: Lollos Productions
Met: Benjiman Jacobs, Linecia MattheeDaniels, Elizna Vermeulen, Redione Stephens en Disco Verhoogbestuurder: Liezl Hendricks
Tien jaar van Lollos en Lettie! En hulle kyk terug op ’n plesierige dekade van die grootste Lollos-treffers wat almal sal laat saamsing en dans. Al die groot gunstelinge is daar: “Die krokodille”, “Die paddakonsert”, “Spring op!”, “Die kiem” en vele meer.
2 Maart 09:00 | 4 Maart 17:00 5 Maart 15:00 45 min | HMS Bloemhof R80 | R100 by die deur
The post US Woordfees 2019: ’n onderhoud met die sterre van Lollos en Lettie appeared first on LitNet.